DINA GERENDENGNA DZIKIR JANARI
JEUNG 2 SAJAK LIANNA
 |
| DINA GERENDENGNA DZIKIR JANARI JEUNG 2 SAJAK LIANNA |
DINA GERENDENG DZIKIR JANARI
( Undang Sumargana)
Diri nyangsaya
Dina rangkulan angin janari
Aya jerit niir langit
Nembus ka gagana wiati
Dina gerendeng dzikir janari
Sugan diri aya dina pangampura Gusti
Girimis anjog ngembat lalangsé janari
Sanggeus beurang tadi mata poé
Ngarerab kasarakahan nu ngabubulak
Sagebar dosa nu atra nembongan
Jadi panghalang na doa nu dipersabenan
Mugia ieu dosa ngalembéréh dina pangsujudan
Teu bade nganaha-naha Gusti......
Rumasa, abdi rumasa ieu diri
Dina renghap sadami-sadami
Kuring ngaheja asma Anjeun ya Robbi
Ya Rohman
Ya Rohim
Ya mujibas Syailin.
Keun ieu kalbu sina ngalagu
Ieu ngan ukur pangabakti Ya Illahi
Tasik Pakidulan Agustus 2022
KLIK DI SINI
NYORANG JALAN PANGBALIKAN
( Undang Sumargana)
Raga-raga nu ngarigig mapaes dunya
Geus lumampah sakarep ingsun
Hirup teu boga rasa rumasa
Ngarasa dirina boga kawasa
Padahal nyawa moal ngancik salilana
Jiwa-jiwa nu angkara
Kalimpudan ku kasarakahan
Padahal kahirupan dunya ngan ukur hiasan
Naon nu jadi andelan nyorang jalan pangbalikan ?
Naha harta numpuk ladang basilat
Rek tega diwariskeun ka anak incu kana masia
Atawa pangkat jeung gelar kahormatan
Ukur jadi tulisan na tutunggul di pajaratan
Kaadilan Alloh moal melok ku panyombo
Para malaikat moal kabengbat ku carita pangacara
Taya hargana kapinteran keur didunya
Lampah sasar geus moal bisa ditutupan
Tasik Pakidulan Agustus 2022
KIYAMAH
( Undang Sumargana)
(Haturan ka wargi pangling-ngeling kana datangna poe balitungan)
Ting burisat cahya kilat
Ngalentab ngahuru jagat
Ngageleger sora gugur
Langit genjlong bumi eundeur
Hujan rongkah,
caah bedah teu katadah
Bumi ngaplak taya sisi
Lautan pindah kadarat
Pangeusina ting koceak
Jeritna mapakan langit
Tinggal raga taya nyawa
Ngagulung nyarah jeung runtah
Langit rungkad.
Ngalingkup murulukeun bentang
Muragkeun bulan, ngabahekeun panon poe
Jagat ancur nggulung jadi lautan
Taya sesa sakabeh anu nyawaan
Sukmana geus ting belasat ngabaliur kabuana
Tinggal raga patulayah nyangkere geus jadi bangke
Reup jagat simpe rehe
Nunggu hudang digebrag kumpul di alam masyar
Balitungan panungtungan, tinimbangan maha adil
Rek beurat kamana timbangan urang?
Katuhu alamat surga sumber lana kabagjaan
Atawa Kenca
Alamat nandang tunggara nngarasa siksa naraka
Wallahu Alam
Gumantung ka pepelaakan dina lampah kahirupan.
KLIK DI SINI
Tasik Pakidulan, Agustus 2022
Tidak ada komentar:
Posting Komentar