BEJA TI SISI LAUT KIDUL
(Undang Sumargana)
Cikalong ngajajar leuwi anyar
Liang tapak ngukuy keusik
Nu nyesa hampasna nu patulayah
Sareukseuk pangdeuleu ngonang hariwang
Cidadap basisirna burakrakan
Karang Bayawak tinggal bangkarak nu patulayah
Nu nyesa kebul kapeurih karisi datang tsunami
Kasarakahan geus meulit na hate
Manusa iblis bangsat lingkungan
Pamayang, Sindang Kerta, Cipatujah
Sapanjang basisisir geus diturih Ku mesin kasarakahan
Pasir beusi jadi saksi Jadi bancakan bagi bagi
Nu hasil pengusaha jugala, pereman jeung para pejabat basilat
Rakyat leutik ngegel curuk kur kabagi kebul jeung leutakna
Emh dedeuh teuing…..!
Tasik Pakidulan 2023
KIYAMAH
( Undang Sumargana)
Ting burisat cahya kilat
Ngalentab ngahuru jagat
Ngageleger sora gugur
Langit genjlong bumi eundeur
Hujan rongkah,
caah bedah teu katadah
Bumi ngaplak taya sisi
Lautan pindaha kadarat
Pangeusina ting koceak
Jeritna mapakan langit
Tinggal raga taya nyawa
Ngagulung nyarah jeung runtah
Langit rungkad.
Ngalingkup murulukeun bentang
Muragkeun bulan, ngabahekeun panon poe
Jagat ancur nggulung jadi lautan
Taya sesa sakabeh anu nyawaan
Sukmana geus ting belasat ngabaliur kabuana
Tinggal raga patulayah nyangkere geus jadi bangke
Reup jagat simpe rehe
Nunggu hudang digebrag kumpul di alam masyar
Balitungan panungtungan, tinimbangan maha adil
Rek beurat kamana timbangan urang?
Katuhu alamat surga sumber lana kabagjaan
Atawa Kenca
Alamat nandang tunggara nngarasa siksa naraka
Wallahu Alam
Gumantung ka pepelaakan dina lampah kahirupan.
Tasik Pakidulan, 5 April 2016
BACAAN LAINNYA:
- PENDEKAR SAKTI BAYU SAMUDRA DARI LAUT SELATAN BAGIAN 8
- PENDEKAR SAKTI BAYU SAMUDRA DARI LAUT SELATAN BAGIAN 7
- PENDEKAR SAKTI BAYU SAMUDRA DARI LAUT SELATAN BAGIAN 6
- PENDEKAR SAKTI BAYU SAMUDRA DARI LAUT SELATAN BAGIAN 5
DEMO RAKYAT
(Undang Sumargana)
Ngageleger sora gugur meupeuskeun reueuk
Tingbarasat cahya kilat ngalentab mega
Ngahuru amarah silalatuan
Ngempur hurung na tungtung emun-emunan
Rahayat kahuru dimangfaatkeun ku kabingung
Ting porongos ting jorowok
Nusurak eak-eakan, nu demo gogorowokan
Turuhkeun harga! Turunkeun harga!
ceuk sora lalaki nu igana ragas, matana celong.
Turunkeun BBM, turunkeun BBM
Eh, BBM geus turun, tapi hahargaan malah ngajaul
Nu ngagorowok latam-letem kaeraan
“Saudara-saudaraku” Ceuk pimpinan demo
Anu tadi turun tina mobil mewah
Bajuna perlente, erloji bermerk,
Sapatu buatan luar negeri
“Kita terus berdemo-kita gempur istana”
Amarah rakyat kasundut
Nu demo beuki ngangseg
Budal omongan teu kawadahan
“Hidup pimpinan kita! Hidup pimpinan kita”
Ceuk rakyat nyumangetan pimpinan demo
Rakyat ngangseg maju, pulisi bedah amarah
Bukbek peureup jeung peureup,
Panakol jeung panakol
Pimpinan demo ngolesed lalaunan
Akhirna ngabiur pangheulana
Ngadius na mobil mewah muru hotel
Arek otel jeung bikang paneretan
Rakyat jadi korban ti jalma
Nu pundung teu kapeto jadi pimpinan
Sarta teu ngasaan diuk na amisna korsi Dewan
Tasik Pakidulan, Kamis 31 Maret 2016
KLIK Di Sini
Tidak ada komentar:
Posting Komentar